BALADA
Que non che doa nada,
nin este extremo de río,
nin ese alento que xa se descompón
en prematuro silencio.
Que non che doa a vida
que a ausencia non che doa,
nin as grosas palabras dos exilios
nin a constante presenza das sombras.
Que non che doa eu,
nin as tardes de maio
con arrecendo a cerna,
nin os altos solpores do estío.
Que non che doa a dor do cuarto
que te garda,
nin a luz desta tarde
que te evita.
Que non che doa a terra
nin os nomes
que non pronunciarán os labios.
Que non che doa a nada.
En Mar de Lira (2005)
No comments:
Post a Comment