O BAILE DA NOITE
Sinto que hai unha salvación
onda a illa dos nosos ollos
somos dous bonecos de trapo
sorrimos case sen pensalo
ti esvaras polo meu interior
es unha mansa invasión eléctrica
podo sentilo e ti podes sentilo
levas dentro a loucura e as promesas
tráfico de luces no gramófono enfebrecido
misterio e desexo son varelas da noite
Sinto que hai unha salvación
achégaste a min ti eléctrico espellismo
a paixón refulxe agora coma nun ceo sen esquinas
Colles a miña man e eu collo a túa
ninguén máis ca nós sabe o segredo
As nosas sombras bailan contra a perfidia
o tempo nunca deixa de correr
namorado furacán rei das apostas
sinto que hai unha salvación
silencios tecidos de catedral e desexo
no desprezo das dores que cargamos
somos amantes malditos
oferentes foraxidos no brillo do escuro
sinto que hai unha salvación
e os teus pés non deixan de bailar
xuntos faremos a nosa historia.
En Long Play (2017)
No comments:
Post a Comment