Epitaphs (XV): Posthumous Letters in Paris (I) Père Lachaise

William Shakespeare dicía en Richard II, “Let's talk of graves, of worms, and epitaphs". Pois falemos de tumbas e epitafios, neste caso en relación ao Père Lachaise de París. Os vermes deixámolos para mañá, que trataremos o libro de Karl Ove Knausgård. 

Esta parada na capital francesa non só é para coimetrófilos, pois disque Père Lachaise é dos camposantos máis visitados do mundo. Abriu no 1804, leva o nome do confesor de Luís XIV (Père François d'Aix de la Chaise, 1624-1709) e ten arredor dunhas 70.000 tumbas nun xardín que ocupa unhas 44 hectáreas. Podedes botar un par de horiñas alí, e recoméndovos mercar un mapa no quiosco que hai no Bd de Ménilmontant para non perderse entre tanto boulevard.

A maioría dos visitantes anda na procura das tumbas dos ilustres: Chopin, Jim Morrison, Oscar Wilde, Molière, Apollinaire, Balzac, Proust ou Gertrude Stein entre outros. Só con esas a visita dá para moito, pero a verdade é que paga a pena levar un ritmo pausado e contemplar o que parece que é unha especie de batalla entre burgueses e bohemios. 

Hai mausoleos enormes decorados con estatuas espectaculares de anxos e escenas de pranto ou desconsolo extremo por unha banda, e por outra tumbas máis modernistas, outras humildes, ou kitsch ou mesmo tecnolóxicas (buscade a do código QR nas fotografías que seguen).

Entre criptas e árbores inmensas, unha rede de camiños adoquinados que parecen absorber os ruídos da cidade. Só se escoitan os nosos pasos e os da morte.

Tumba de Oscar Wilde, obra do escultor Jacob Epstein (1914)

Tumba de Jim Morrison, cun epitafio en grego  “Κατά τον δαίμονα εαυτού” que nos recorda que viviu fiel ao seu espírito libre

A tumba de Morrison é das máis visitadas do cemiterio

Os/as fans deixan as súas homenaxes en forma de palabras ou chicles mastigados

A insólita tumba 2.0. Para saber máis, preme aquí

Outro detalle da tumba 2.0 

Tumba de Claude Chabrol

A fermosísima tumba de Frédéric Chopin

Tumba de Simone Signoret e Yves Montand

Tumba de Marcel Proust