Friday, April 29, 2016

Letters in Books: A república das palavras

Séchu Sende defínese como poeta, narrador ativista social e domador de pulgas. O seu primeiro libro, Made in Galiza, creo que foi o que máis prestei de todos os que teño, e a xente ben variopinta, por certo, e todos/as ben encantados/as coa experiencia lectora. O seu segundo libro A república das palavras (2015), vai na mesma dirección e estilo, relatos curtiños, reflexións sobre a lingua, ironía, humor e retranca. Con algúns deles rin a gargalladas, e outros son dunha tenrura exquisita, coma este:

Palavras
 (p.51)

-          A ver, como fai a vaca?
-          Muuu…
-          E como fai o cão?
-          Bau!, bau!
-          Mui bem! E a ovelha… Como fai a ovelha?
-         
-          Sim, vamos… A ver, a ovelha. Como é que fai a ovelha? Recordas?
-          Meee…
-          Bem! Vês, mui bem, hoje lembrache como falam os animais, mamãe.

Especial tamén a Carta ao “Estimado sehnor Malkovich” (p.61), onde escribe ao actor para que corrobore como Casilda, señora de 80 anos de Ponte Maceira, vendo a Malkovich tentar pescar falándolle ás troitas en inglés, recoméndalle falarlles na nosa lingua, “Trui-ti-nhas,  trui-ti-nhas”. Malkovich segue o seu consello e pesca “uma maravilhosa truta com as cores do arco da velha” (p.62).

E pechamos cunha cita do conto “Topónimos exóticos na Galiza”: “Os caminhos do mundo que nascem na Galiza só se podem conhecer se compartires o caminho das palavras. A língua é o nosso lugar comum” (p.124) e estoutra de “David Copperfield não tem nada a ver com isto”: “É inevitável: as nossas palavras mudam o mundo!” (p.135). Así que olliño coas que escollemos…





No comments:

Post a Comment